Miatembang ko Gola teneb

Giyae kon a kaoyag oyag sa Dunya na makasasayan sa datar angkai a pagaloin tano a mia ilay sa tatagenepen.

Miaka isakon a gagawie na mitatagenep si di tatagenep, di sekanian kon di salobaan o Arimao, sa bapya anda sekanian somong na diron di salobaan o Arimao, sa si aki ini di tatagenep na sabap ko kalek yan ki Arimao na di nyan di papalagoyan. Mia oro sekanian o Arimao sii ko kilid a pangba a sa baba angkoto a pangba na miakaliboliboteng. Sa gyoto a kilid a pangba, na aden a pamomolaanon, na miakapagapason sakioto na miaka sambitin sii ko sapak angkoto a kayo. Na katotolongan yan angkoto a kababaan a pangba a kialiboteng.. Sa gyoto a kasasalambitiin yan sangkoto a sapak na mia ilay nyan gya dowa teman a Riya, maputi a Riya go Maitem a Riya a pereteben iran angkoto a sapak a kakaptan yan. Na lomiangag sa puro sekanian na kiatakan a ngari iyan sa gola a teneb a makapopoon sii ko walay o batiokan sangkoto a kayo. Sa kiababayaan nyan a tanto angkoto a pagtak sii ko ngari yan a gola teneb sa ronon miabimban na kialipatan yan angkoto a Arimao a diron di salopog a nomanayao ron, go kialipatan yan angkoto a baba a pangba a kaologanon a kialeboteng, o makaboka, go kialipatan yan angkoto dowa teman a riya a pereteb sangkoto a sapak a kakaptan yan. Na sabap ko kialipat / kiabimban yan na kiarotan tumeteb o dowa a riya angkoto a sapak a kakaptan yan na domipeng sekanian sangkoto a didalem a pangba a mikaleboleboteng.

Datar ko ini manga pagaria go manga babayko so kaoyag oyag sa Dunya, angkoto a Arimao na datar kon oto so Kapatay, ka bapya anda tano kon somong, bapya e kapalagoe ko Kapatay na so Kapatay na ditano niyan di salobaan sa ditano nyan botagan. Na gyoto kon a baba a pangba a miakaleboleboteng na datar kon oto so Pakoboran tano a miakaleboleboteng, na palaya tano san kapadalem. Gyoto peman kon dowa teman a Riya, a Maputi a Riya go Maitem a Riya na datar kon oto so di kapaka sambii o kagagawii go kadaondaw na oman meseg so gawii na pakarani tano mambo ko pakoboran tano. Na gyoto peman a Gola teneb na datar kon oto so orareg o Dunya a miaka bemban reka ko kipeng golalanenka ko titho a Antap o kaoyag oyag ka maana so ka Simba angka ko miaden reka a so ALLAH (S.W.T). Sa kailangan a ankai a Dunya na mabaloy a aya tano mitowak sii ko kakowa tano ko Limo o ALLAH a kapadalem tano sii ko Sorga iyan. Sa mabaloy a gya Dunya a babasoka tano sa manga pipiya a AMAL a ikasowat rektano o ALLAH.